Politike

E duam Shkodrën po aq shumë sa Vlorën, e duam Shqipërinë në çdo cep të territorit të saj

Diskutimi në parim i buxhetit është një ndër momentet më të rëndësishme të jetës parlamentare të dy sesioneve që përbëjnë vitin kalendarik.
Në fillim të fjalës sime, dua të them dy fjalë lidhur me dorëheqjen e sotme të Presidentit të Republikës së Kosovës, z. Hashim Thaçi.
Mendoj që ne si Kuvend duhet të shprehim të gjjithë solidaritetin për këtë akt prej shtetari të Presidentit Thaçi për t’u vënë në dispozicion të Gjykatës së Hagës, duke theksuar se lufta për çlirimin e Kosovës nga pushtuesi serb, nga genocidi serb, ka qenë një luftë e pastër, e drejtë dhe ka qenë e mbetet një luftë çlirimtare.
Në këtë kontekst dua të nënvizoj se historia në asnjë vend të globit nuk do të shkruhet me akt-akuza dhe vendime gjykate. I them çdo bashkëatdhetari se Kosova sot nuk është në një ditë të vështirë, përkundrazi, Serbia duhet të ndihet si e tillë. Kosova po vendos një standard në marrëdhënie me drejtësinë ndërkombëtare. Çdo prirje e politikanëve serbë apo mediave për të etiketuar pavarësinë e Kosovës dhe këto akte prej shtetari të lidershipit të politikës së Kosovës, nuk mund të bëjnë aspak pis luftën e UÇK-së.
Qoftë Thaçi apo burra e gra që kanë kontribuar, do të dalin ballëlartë e faqebardhë në fund të këtij procesi. Nuk ka asnjë dyshim të bazuar në prova të mirëqena.
Besojmë që drejtësia do të bëjë punën e saj në kohë. Ashtu siç e tha dhe Thaçi, nuk është koha për lamtumirë, por për një transparencë përfundimtare pas 20 vitesh. I uroj të gjithë luftëtarëve të UÇK të përballen me ccdo akt-akuzë dhe me të gjitha gjykatat e mundshme, me dinjitet kombëtar , ashtu sicc i ka hije shqiptarëve, sepse janë i vetmi komb që kanë luftuar për çlirim dhe jo për pushim. Shqiptarët gjithmonë janë mbrojtur, nuk kanë sulmuar. Janë model dhe ky është mesazhi që duhet të çojmë në solidaritet të plotë me lidershipin politik të Kosovës duke i uruar të përballen me dinjitet.
E dyta, jemi në një situatë të vështirë prej Pandemisë. Njëri prej kolegëve që ka kaluar Covid-19 u shpreh me të drejtë se duhen respektuar të gjitha masat. Media publikon shpesh herë raste të politikanëve të papërgjegjshëm, sikurse është një zonjë që i bën bisht ligjit. Ligji vepron dhe duhet të veprojë njësoj për të gjithë. Kur gjobiten 700 qytetarë në ditë, edhe Monika Kryemadhi duhet të gjobitet dhe të paguajë gjobën.
Dua të kujtoj se ky Kuvend ka miratuar edhe penalitete më të rënda, sikurse janë ndryshimet në Kodin Penal. Nëse këta qytetarë nuk vënë mend dhe me dëshirë e vetëdije bëhen përhapës të këtij virusi vrasës, do të ndëshkohen sipas ligjeve në fuqi.
Ky virus është një armik i padukshëm dhe mund të sjellë dëme të parikuperueshme. Megjithëse rastet në Shqipëri, krahasuar me rajonin, janë të ulëta, nuk duhet ulur gadishmëria.
Lidhur me buxhetin, nxis Komisionet të vazhdojnë bëjnë punën e tyre me diskutimet. Kemi dy javë punë intensive për të ardhur në seancën e fundit.
Unë jam shumë krenar si Kryetar i Grupit Parlamentar të Partisë Socialiste, që ky Kuvend bën rritjen më të madhe të pagës minimale në ekonominë shqiptare në 10 vitet e fundit. Çdo familje shqiptare ku njëri prej prindërve është në punë, i garantohet të dërgojë në shtëpi minimalisht 300 mijë lekë të vjetra.
Për vitin 2021 dua të them gjithashtu se falë mirëadministrimit financiar, pavarësisht goditjes që i dha ekonomisë pandemia dhe buxhetit për infrastrukturën e rindërtimit, 260 miliardë lekë, ne përsëri jemi në kushtet që të garantojmë një rritje të pagave të planifikuar në shumën e 80 milionë dollarëve. Këtu përfshihet edhe rritja e pagës me 40% për punonjësit e sistemit shëndetësor dhe 15 % për punonjësit në sistemin arsimor. Në numra nominalë janë 4650 mjekë në kujdesin parësor dhe dytësor, të cilëve u rritet paga në vitin 2021. Janë 13765 infermierë e laborantë, të cilëve u rritet paga në vitin 2021. Janë 35883 mësues të arsimit parauniversitar, të cilëve u rritet paga. Këto janë shifra konkrete. .
Sot mirëadministrimi i financave publike na bën të kemi mundësitë të përfundojmë procesin e rindërtimit brenda vitit 2021, të mos prekim pjesën më të rëndësishme të investimeve publike që janë të detajuara në tabelat e buxhetit.
Puna parlamentare e çdo deputeti është që të shohë me vëmendje të gjithë detajimin e buxhetit, përsa i përket çështjeve të investimit dhe alokimit të resurseve buxhetore.
Në këtë buxhet ne vazhdojmë të mbështesim reformën në drejtësi dhe çdo bashki në vend.
Tek Reforma në Drejtësi japim 53 milionë dollarë të tjera për 668 personel shtesë të punonjësve.
Këtu gjej rastin të vazhdoj të shpreh mbështetjen e plotë për procesin historik të pastrimit të drejtësisë nga gjyqtarë e prokurorë të korruptuar, duke nxitur ecjen më tej të procesit të Vetting-ut dhe goditjen e çdo gjyqtari apo prokurori që vazhdon të bëjë Pazar me drejtësinë. Të tilla janë rastet e fundit të zbuluara nga media në vend, ku gjyqtarë apo prokurorë në vetëdije të plotë të moskalimit të procesit të Vetting-ut, vazhdojnë të bëjnë tregti me drejtësinë. Këto akte të rënda nuk do të shpëtojnë pa ndëshkim.
Pas procesit të Vetting-ut ata gjyqtarë e prokurorë me problematika të rënda në pasurinë e tyre do të ndiqen penalisht.
Në fund gjej rastin të falenderoj ministrat e kabinetit qeveritar që kanë arritur të planifikojnë në secilin prej sektorëve të tyre investime të rëndësishme në të gjithë territorin.
Nuk është aspak e vërtetë ajo që ngriti një prej kolegëve. Nuk ka dhe nuk ka për të pasur kurrë një qeveri të Partisë Socialiste, që do të bëjë diferenca mes Veriut dhe Jugut.
Nëse i merrni shifrat një për një, do të shikoni se e kundërta mund të jetë e vërtetë. Politika jonë i trajton komunitetet të gjitha njëlloj.
Për mua si Taulant Balla apo Kryeministrin Edi Rama, e duam Shkodrën po aq shumë sa Vlorën, e duam Shqipërinë në çdo cep të territorit të saj.
Faleminderit!

Politike

Rama është një Veliaj i gjatë

Nga Basir Çollaku

Edi Rama nuk e largon Erion Veliajn nga vetja, si zgjatimi kryesor i tij, bashkëvjedhës kanibal, thjesht duke e prerë nga një foto.

Alarmi është Rama. Veliaj është aksesor për të që ai e heq si fletushkë. Të gjithë brenda oborrit të pushtetit, u fikën dhe nuk po e mbrojnë hajdutin bashkiak që plaçkiste me dijeni e leje të Ramës.

Rama është një Veliaj më i gjatë, më dinak më i pasur e më hileqar. Por ngjajnë në shumë lloj pervesitetesh.

Lidhjet kriminale i kanë në të njëjtën parcelë. Arrestimi i grabitësit bashkiak duhet të jetë paradhoma e prangave të shefit të tij politik. Kjo ndëshkueshmëri nuk zgjidhet me bedelizëm. Lejet e ndërtimit në Tiranë nuk janë firmosur asnjëra pa dijeni-miratimin e Kryeministrit.

Veliajt i duhet të shkërmoqte me drejtorët e tij të gjithë financat publike, sepse nuk e mbante dot qesen me përqindje, ngaqë duhej të paguante taksimin në vendin e duhur qeveritar.

Pema ku do të varet bashkiaku sipas midesë se shefit, ka degë edhe për Ramën. Bashkiaku është një nga provat e inkriminimit ekstrem të kreut të qeverisë. Në Shqipëri dhe nëpër ofshore.

Kjo është provë opozitare edhe për të fshehtat që do përdoren nga palët për të mbijetuar. Kush nuk ka mëkate do të shihet nëse hedh gurë mbi fajtorin. Në këtë zënkë të fundit mes tyre nuk po shfaqet as tutori i përbashkët Alex Soros. Fundja ai ka kryer hallet e tij me blerjet. Është koha për shitje..Rama dhe Veliaj ishin dhe janë PPP e tij.

Me këto dosje të nisura, SPAK ka hapur një shteg përvëlues, që nuk mund ta mbyllë as vetë SPAK.

Politike

Deputeti i PD kundër Berishës dhe Metës: SPAK, i vetmi mjet shpëtimi për vendin

Deputeti i PD, Dashnor Sula vlerëson punën e Prokurorisë së Posaçme në goditjen e korrupsionit të nivelit të lartë dhe krimit të organizuar.

Sula tha se SPAK drejtohet nga një prokuror me integritet dhe i ndershëm si Altin Dumani.

Deklaratat e deputetit demokrat janë kundërthënëse me qëndrimet e ish-kryeministrit Sali Berisha dhe kreut të Partisë së Lirisë, Ilir Meta të cilët e quajnë SPAK-un çetë partiake dhe mashë në duart e PS.

“Në çdo takim të gjithë qytetarët e thjeshtë flasin për SPAK-un. Kanë besim qytetarët që do të shpëtojnë nga kjo e keqe e madhe që ka kapur Shqipërinë nga mazhoranca dhe politika në tërësi. Thonë do të jetë SPAK-u mjeti i shpëtimit. Është fatkeqësi, por është e vërtetë. Nuk pretendoj që të gjithë prokurorët e gjyqtarët e SPAK janë shumë të mirë. Por po përmend katër persona, dy dibranë Altin Dumanin dhe Adnan Xholin, Behar Dibra e Elvin Goga të cilët janë të katër prokurorë me integritet dhe shumë të ndershëm“, u shpreh Sula, duke shtuar se rezultatet e SPAK janë pozitive pavarësisht pengesave që i bëhen nga politika.

Ola Bruko: Jeni pro zgjatjes së mandatit së prokurorëve të SPAK?
Dashnor Sula: Këto mprokurorë duhet të jenë në detyrë si të gjithë prokurrët e tjerë, jo me afat kohor. Specifika e punës që ka Prokuroria e Posaçme dhe Gjykata është e një rëndësie jashtëzakonisht të veçantë. Nëse nuk kanë garancinë e përmbushjes së detyrave, pasi ikin nga kjo detyrë mund të kenë probleme. Këto duhet të jenë aty në respektim të ligjit dhe Kushtetutës. Deri më sot rezultati është pozitiv, pavarësisht pengesës që i bëhet.

Ola Bruko: Cili është shembulli konkret që tregon se puna e SPAK ka qenë e kënaqshme?
Dashnor Sula: Ne kemi 34 vite. Kanë kaluar mjaft politikanë. Pse nuk ka ecur politika aty ku duhet të shkojë, por mban erë të keqe? SPAK s’ka as 4 vitete aktivitet real. Me zotin Dumani në krye e këtej ka ndryshime thelbësore. Rasti i fundit i thirrjes dhe pyetjes së kryetarit të bashkisë 7-8 orë. Unë kam bindjen që ai do të jetë perosn në hetim, tjetër gjë se çfarë nxjerr hetimi, por indiciet janë mjaft të forta. Një qytetar sot më tha: 10% këta e marrin për tendera, por këta nuk lënë asgjë të lëvizë paraja, që ta marrë biznesi, firmat, por këta i duan të gjitha për vete”. Problematikat janë të mëdha. Veliaj nuk mund të dalë të shesë moral në televizione. Nuk kam asgjë personale me të. Paratë tona i marrin drejtorët e tij, pasurohen, bëjnë hotele me 5 yje dhe të thuash nuk di gjë. Ata dinë edhe orarin e drejtorit kur hyn në bashki, edhe të nëpunësit më të thjeshtë e dinë kur hyn.

Politike

Komuna arbëreshe e Pallagorisë hap dyert për personalitetet shqiptare në viset ballkanike

Komuna arbëreshe e Pallagorisë hapi dyert sot për personalitetet shqiptare të katër shteteve në Ballkan: Shqipërisë, Kosovës, Maqedonisë së Veriut, Malit të Zi, si edhe për autoritetet e larta italiane, me rastin e kremtimit të 100-vjetorit të vdekjes së intelektualit arbëresh, Anselmo Lorecchio.

Pjesëmarrja e Presidentit të Republikës së Shqipërisë Sh.T.Z.Bajram Begaj dhe shefit të diplomacisë italiane, Antonio Tajani, ishin një simbolikë e bukur e këtij përkujtimi, duke dëshmuar rëndësinë e lidhjeve kulturore dhe historike midis Italisë dhe Shqipërisë. “Dëshira dhe mendimi i Anselmo Lorecchios për një Evropë të bashkuar duket sikur sot në këtë vend, në Pologoria, gjejnë vend, sepse janë bashkë Italia, Shqipëria, Kosova, Maqedonia e Veriut dhe Mali i Zi”, – u shpreh Presidenti Begaj në ceremoninë për Lorecchion, që vijoi me inaugurimin e sheshit për nder të tij e më pas me mbajtjen e konferencës ndërkombëtare. Presidenti i Republikës së Shqipërisë, Sh. T. Z. Bajram Begaj, u shprehu mirënjohje arbëreshëve që veç traditës, kulturës, gjuhës dhe vlerave identitare, promovojnë dhe figurat përbashkuese e me vizion për ardhmërinë.

“Anselmo Lorecchio nuk ishte vetëm një patriot, por një urë mes dy botëve, asaj arbëreshe në Itali dhe shqiptare në Ballkan. I lindur në një kohë kur identitetet kulturore po formësoheshin dhe përcaktoheshin nga luftërat dhe ndryshimet politike, Lorecchio kuptoi rëndësinë e identitetit kulturor, të ruajtjes së gjuhës dhe zakoneve arbëreshe. Ai i mbrojti dhe zhvilloi ato me përkushtim të pathyeshëm”.

Presidenti i Shqipërisë vlerësoi veprën e Anselmo Lorecchios, një personalitet që la gjurmë të pashlyeshme në historinë e Shqipërisë në përpjekjet për pavarësi dhe kontribuoi ndjeshëm në kulturën dhe historinë e komuniteteve arbëreshe në Itali.

“Ai nuk ishte vetëm një patriot, por ishte një urë midis dy popujve, atij arbëresh në Itali dhe shqiptar në Ballkan. I lindur në një kohë kur identitetet kulturore po formësoheshin dhe përcaktoheshin, jeta e tij është një testament për kulturën dhe trashëgiminë arbëreshe, duke u bërë një zë i fuqishëm për Italinë e më gjerë. Figura e tij na kujton rëndësinë e mbrojtjes së të drejtave dhe ruajtjes së identitetit në një botë që shpesh na shtyn drejt asimilimit dhe uniformizimit”, – deklaroi Kreu i Shtetit.

Presidenti Begaj vlerësoi ndikimin e Lorecchios me gazetën “La Nazione Albaneze “, e cila luajti një rol themelor në nxitjen e ndjenjës kombëtare dhe në përhapjen e ideve për çlirimin dhe pavarësinë dhe e kombit shqiptar.

Në këtë konferencë, Kreu i Shtetit bëri thirrje për të nderuar të kaluarën e për të ndihmuar në ndërtimin e një ure midis brezave dhe kulturave, duke pasuruar jo vetëm komunitetin, por edhe botën rreth nesh.

Presidenti Begaj vizitoi, gjithashtu, edhe ekspozitën kushtuar Anselmo Lorecchios në Pallagoria.

Politike

Presidenti Bajram Begaj shpallet “Qytetar Nderi” i Pollagorios

Presidenti Bajram Begaj ka zhvilluar një sërë takimesh me komunitetet arbëreshe në Kalabri ku po zhvillon një tur dy ditor, me ftesë të Institutit për Komunitetin Arbëresh.

Kreu i shtetit, ka marrë titullin “Qytetar nderi” i qytetit të Pollagorios.

Ajo theksoi se ishte bukur, teksa takon arbëreshë që kanë ruajtur gjuhën.

Aktivitetet e shumta po mbahen në nder të 100 vjetorit të ndarjes nga jeta të poetit arbëresh Anselmo Lorecchio.

Politike

“30 raste të fyerjes ndaj gazetarëve”/ Açka letër të hapur Ramës: Gazetarët shantazhohen

Kryetarja e Komisionit Parlamentar për Mjetet e Informimit Publik, Flutura Açka, i është drejtuar kryeministrit Edi Rama me një letër të hapur.

Në një postim në rrjetet sociale, ajo shkruan se vetëm gjatë periudhës 2023-2024, ka pasur 30 raste të gazetarëve të cilët janë fyer.

Ajo shton se gazetarët shqiptar nuk kanë nuk kanë status mbrojtës të veçantë, intimidohen shpesh për t’u nënshtruar përmes favoreve shtetërorë qendrorë dhe lokalë, shantazhohen shpesh nga pushteti dhe janë pjesa e shqiptarëve më e ekspozuar nga arroganca e pushtetit dhe e politikës.

Postimi i plotë:

Zoti Kryeministër,
Në vitet 2023-24 ka mbi tridhjetë raste që gazetarët shqiptarë janë fyer dhe linçuar, në disa prej të cilave ju jeni protagonist.
Në Ditën Ndërkombëtare të Medias, ju jeni njeriu i fundit që mund të bëni moral për lirinë e fjalës dhe shtypit.
Gazetarët shqiptarë:
– nuk kanë status mbrojtës të veçantë që të jenë tërësisht të mbrojtur
– paguhen më së shumti nën dorë dhe një pjesë é tyre janë të pasiguruar
– diktohen nga shefat e tyre për vërtetësinë e lajmit dhe humbim vendin é punës nëse nuk binden
– u jepen kaseta të gatshme nga politika dhe u diktohet linja politike nga konjukturat politike
– nuk kanë asnjë siguri për vendet e punës prej mungesën së kontratave
– shantazhohen shpesh nga pushteti me të gjitja format é mundshme përmes drejtuesve dhe familjarëve
– intimidohen shpesh për t’u nënshtruar përmes favoreve shtetërorë qendrorë dhe lolalë
– janë pjesa e shqiptarëve më e ekspozuar nga arroganca e pushtetit dhe e politikës.
Si drejtuese Komisionit Parlamentar për Mjetet e Informimit Publik dhe si njeri i zejes së fjalës shpreh mbështetjen time të plotë ndaj gazetarëve shqiptarë, të drejtave dhe rolit të tyre të shenjtë në mbrojtje të fjalës së lirë.