Aktualitet

Seminari ripërdorimi i pasurive të konfiskuara nga veprimtaria kriminale

Sot u organizua nga Departamenti për Kërcënimet Transnacionale i Sekretariatit të OSBE-së dhe Zyra e Koordinatorit të OSBE-së për Veprimtaritë Ekonomike dhe Mjedisore,seminarin online “Trajtimi i krimit të organizuar dhe korrupsionit përmes ripërdorimit të pasurive të konfiskuara nga veprimtaria kriminale”.

Në seminar morën pjesë edhe ambasadorja e Shteteve të Bashkuara të Amerikës, Yuri Kim, Kreu i Delegacionit të Bashkimit Evropian në Shqipëri, ambasadori Luigi Soreca, zëvendësministri i Brendshëm, Besfort Lamallari, dhe përfaqësues të institucioneve shtetërore dhe shoqërisë civile në këtë fushë.

Synimi i seminarit ishte rritja e ndërgjegjësimit për dobinë e ripërdorimit të pasurive kriminale të sekuestruara si një e mirë publike dhe si një mjet për të zvogëluar krimin dhe korrupsionin. Veprimtaria ishte pjesë e një sërë seminaresh të tilla rajonale.

FJALA E KRYETARIT TË PREZENCËS

I nderuar Zëvendësministër, Shkëlqesi, të nderuar kolegë, zonja dhe zotërinj!

Kam nderin të hap këtë seminar online, duke u përqendruar te një temë sa e ndjeshme aq edhe kritike për Evropën Juglindore dhe, nëse më lejoni ta them, për të gjithë zonën e OSBE-së.

Këtë çështje mund ta trajtojmë nga disa këndvështrime dhe me një sërë instrumentesh, dhe mbase një nga vështirësitë kryesore qëndron në kombinimin e duhur të politikave dhe masave që duhen ndërmarrë.

Nga njëra anë, kemi ligjin tradicional të sanksioneve, me fjalë të tjera kodin penal. Nga ana tjetër, kemi politikat parandaluese, ku faktorë kryesorë janë transparenca dhe përhapja e kulturës së ligjshmërisë brenda një shoqërie. Të gjithë mund të jemi të një mendjeje për faktin se ilaçet parandaluese shpesh kushtojnë më pak dhe janë më efektive sesa terapia e kujdesit intensiv.

Në të vërtetë, tema e sotme e diskutimit ngre një tjetër sfidë të madhe, përpos parandalimit dhe shtypjes: po flasim për mënyrën e menaxhimit të pasurive të konfiskuara. Në këtë drejtim, Raporti i Komisionit të BE-së për vitin 2020 ka njohur qartë progresin e bërë në sekuestrimet dhe konfiskimin e pasurive nga aktiviteti kriminal, por njëkohësisht ka rekomanduar miratimin dhe zbatimin e rregullave që do të siguronin ripërdorimin e pasurive të konfiskuara në mënyrë të shpejtë dhe efikase, me qëllimin që ato të mos e humbin vlerën e tyre ekonomike.

Unë mendoj se, në mbarë OSBE-në, qeveritë, studiuesit dhe ekspertët përballen me të njëjtat dilema dhe të njëjtat pyetje, në kërkim të metodave jotradicionale dhe të një ekuilibri të duhur midis recetave të njohura dhe formulave të reja. Prania e sotme e ambasadores së SHBA-së, e kreut të Delegacionit të BE-së, e zëvendësministrit të Brendshëm Lamallari, e panelistëve dhe pjesëmarrësve tanë të shquar tregon gjithashtu se kjo temë komplekse – ripërdorimi i pasurive të konfiskuara nga veprimtaria kriminale – është mjaft e gjerë dhe ka një natyrë shumëdimensionale.

Pikënisja është aftësia për të kryer hetime të sakta financiare. Po flasim për hetime të një natyre shumë të vështirë, që kërkojnë aftësi dhe mjete specifike.

Një sfidë tjetër ka të bëjë me ndikimin shoqëror të masave gjyqësore që çojnë në konfiskimin e pasurive nga aktiviteti kriminal. Ka vende pune të cilat vihen në rrezik. Ka punëtorë dhe familje të pafajshme që nuk janë në dijeni të faktit se ndërmarrjet për të cilat ata punojnë kanë një origjinë të paligjshme. Këta njerëz janë dy herë viktima. Si t’i godasim veprimtaritë kriminale pa dëmtuar punëtorë të pafajshëm dhe të ndershëm? Si t’i vëmë në dispozicion të shoqërisë civile mallrat dhe pronat e konfiskuara nga organizatat kriminale? Si të promovojmë një dialog gjithëpërfshirës midis institucioneve qendrore e vendore dhe shoqërisë civile për ripërdorimin e pasurive të konfiskuara, me përfshirjen aktive të të rinjve, grave dhe grupeve të cenueshme? Për shembull, përvoja e sjellë nga “Libera” është sigurisht shumë me vend dhe frymëzuese.

Jam i bindur se është tepër e rëndësishme të kemi një perspektivë dhe qasje rajonale në trajtimin e temës shumëplanëshe të ushtrimit të sotëm. OSBE-ja, për natyrën që ka, është në një pozicion ideal për të lehtësuar këtë shkëmbim pikëpamjesh dhe përvojash midis aktorëve kryesorë. Unë e vlerësoj këtë projekt të zbatuar nga kolegët tanë të Departamentit të Kërcënimeve Transnacionale dhe Zyrës së Koordinatorit të Veprimtarive Ekonomike dhe Mjedisore, duke pasur bindjen se përvojat dhe njohuritë tuaja të gjithanshme, si dhe qasja juaj gjithëpërfshirëse për sekuestrimin dhe konfiskimin e pasurive mund të jenë në dobi të rajonit në tërësi.

Në fakt, diskutimet e kësaj teme pasqyrojnë disa nga Vendimet e Këshillit Ministror dhe Këshillit të Përhershëm të OSBE-së (Vendimi i Këshillit Ministror 5/06 për Krimin e Organizuar, Vendimi i Këshillit Ministror 4/12 për Përpjekjet e OSBE-së për Trajtimin e Kërcënimeve Trans-nacionale, Vendimi i Këshillit Ministror 4/16 për Forcimin e Qeverisjes së Mirë dhe Nxitjen e Lidhshmërisë, Vendimet e Këshillit të Përhershëm 1049 dhe 1063). Të gjitha këto vendime të OSBE-së kanë nënvizuar në mënyrë të përsëritur rëndësinë e trajtimit të anës financiare të të gjitha formave të krimit, parandalimin e transferimeve të produkteve të krimit dhe ndjekjen e rikuperimit të pasurive nga aktiviteti kriminal si dhe ato të vjedhura. Ky rend veprimesh është gjithashtu veçanërisht i rëndësishëm për të parandaluar financimin e terrorizmit.

Unë kam besim se mbështetja jonë për vendin tonë pritës do të sjellë një ndryshim. Prezenca e OSBE-së në Shqipëri punon për të forcuar kapacitetin e përgjithshëm të agjencive shqiptare të zbatimit të ligjit, veçanërisht në fushën e hetimeve financiare, konfiskimit dhe kthimit të pasurisë së fituar përmes veprimtarive kriminale. Unë pres që ky seminar të ndiqet në vazhdimësi edhe nga aktivitete të tjera të tjera të ngjashme.

Do të doja të shprehja mirënjohjen time për partnerët e financimit, Shtetet e Bashkuara, Mbretërinë e Bashkuar, Gjermaninë dhe Italinë.

Gjithashtu i nxit partnerët tanë shqiptarë të vazhdojnë të ecin përpara, të ndajnë historitë e tyre të suksesit, duke mësuar ndërkohë edhe nga kolegët në rajon dhe në gjithë Evropën.

Si përfundim, më lejoni të theksoj se OSBE-ja do të vazhdojë të mbështesë fuqimisht veprimtaritë për forcimin e kapacitetit të përgjithshëm të agjencive shqiptare të zbatimit të ligjit, dhe veçanërisht të Agjencisë së Administrimit të Pasurive të Sekuestruara dhe të Konfiskuara. Ne jemi partnerët tuaj për një kohë të gjatë dhe jemi këtu për t’ju ndihmuar.

Ju uroj një seminar sa më produktiv dhe një diskutim të gjallë rreth përvojave specifike të vendit.

Aktualitet

Banesat e dy personazheve të ekranit u kontrolluan nga SPAK, hetuesit janë llahtarisur nga ato që kanë parë

Eksperti i kriminalistikës, Ervin Karamuço tregoi se së fundmi janë kontrolluar nga SPAK banesat e dy personazheve të ekranit, ku i janë sekuestruar telefona dhe pajisje të tjera komunikimi.

Karamuço tha i ftuar mbrëmjen e djeshme në “Top Story” se disa politikanë të lartë janë nën hetim për transaksionet dhe pasuritë që ata zotërojnë.

Karamuço: Meqë jemi tek korrupsioni, aktualisht është duke u zhvilluar një kontroll i madh në disa banesa në Tiranë nga ana e SPAK-ut.

Dy prej tyre i përkasin njerëzve që ne i njohim në ekranet tona. Njërit prej tyre dje në njërën prej shtëpive i janë bllokuar celularë dhe pajisje të tjera të komunikimit.

Grida Duma: Si i njohim në ekranet tona, në çfarë kuptimi?

Karamuço: Janë njerëz të ekranit që dyshohet se janë të lidhur me politikanë shumë të lartë të vendit dhe mendohet që mund të jenë bërë bashkëpunëtorë për pastrimin e produkteve të veprave penale.

Ndërkohë është edhe një grua e moshuar e cila po hetohet si latifondistja më e madhe e rrethinave të Tiranës mbas Toptanësve, por e viteve të fundit që ka toka pafund deri në Rinas.

Grida Duma: Për çfarë hetohet?

Karamuço: Për pastrim të produkteve të veprës penale edhe ajo, transaksione dhe asete në emrin e saj.

Grida Duma: Kur shfaqet për publikun kjo e dhënë se cilët po hetohen me emra?

Karamuço: Janë politikanë të lartë që tani po hetohen dhe janë në fazën e fundit të asaj që ne i themi hinka për të dalë në konkluzione. Vijnë pafund kartela pasurie që shikohen transaksione të reja dhe është një çmenduri.

Ata aty janë llahtarisur nga gjërat që po ju vijnë në burime të ndryshme, nga institucionet shqiptare, lidhur me pasuritë se si janë ngurtësuar, transferuar dhe pastaj janë munduar të fshihen gjurmët.

Aktualitet

Strategjia e përbashkët e Veliajt me kryeministrin është një kurth për opozitën

Analisti Lorenc Vangjeli sheh Erion Veliaj si fitues në sytë e Opinionit public në përballjen e tij me Berishën dhe Metën. Duke folur në emisionin “Opinion”, Vangjeli tha se strategjia e Veliajt është një kurth i përbashkët mes kryeministrit dhe kryetarit të bashkisë, për ta tërhequr kundërshtarin e tyre politik dhe atje ku ata zakonisht fitojnë.

“Qëllimi i zotit Veliaj ishte befasues. Nisur nga ajo që pamë ai ka bërë atë që duhej për mbështetësit e tij dhe për të nisur luftën politike nga dyert e SPAK. Strategjia e tij është një kurth i përbashkët mes kryeministrit dhe kryetarit të bashkisë, për ta tërhequr kundërshtarin e tyre politik dhe atje ku ata zakonisht fitojnë. I gjithë thelbi i kësaj strategjie qëndron tek e bëra e kontrastit mes gjuhës së Berishës dhe Metës për SPAK dhe gjuhës së Veliajt duke i quajtur kolegë dhe bashkëpunues. Duke i thënë publikut atë që do të dëgjojë, Erion Veliaj fiton betejën me publikun…. Të gjithë ata që ai sulmon, përfshi edhe kolegët tanë, njerëzit do thoshin – “He mo se edhe këta njësoj janë”. Dhe kjo është një gjetje inteligjente. Ka zgjedhur që në këtë mënyrë të bëjë numrin 2 të PS dhe të bëjë gardhin e mbrojtjes për PS dhe për Edi Ramën”, deklaroi Vangjeli.

Aktualitet

Kronikë e një arrestimi të paralajmëruar

Nga Lutfi Dervishi

Në ditën kur supozohej ta arrestonin, ai u zgjua në orën 5:30 të mëngjesit dhe bëri një vrap të lehtë në të njëjtën shteg të parkut të liqenit ku kishte nisur prej javësh ushtrimet fizike, veçse atë ditë ajri dukej më i ngarkuar, a thua se ishte mbushur me pëshpëritje e thashetheme për një ngarje të madhe që pritej të ndodhte.

Për javë e muaj me radhë, që nga gushti i vitit të shkuar, kryeqyteti nuk ishte bllokuar nga trafiku, por nga parashikimet e analistëve, gazetarëve dhe komentatorëve politikë, të cilët paralajmëronin me një siguri profetike dhe kënaqësi që nuk e fshihnin dot se Ai, një politikan jo pa ndikim, do të arrestohej së shpejti.

Një tufë të ftuarish dhe tuafësh televizivë nën regjinë e moderatorëve gjithnjë të habitur, flisnin sikur të kishin qenë prapa kurrizit të gjykatësit që kishte firmosur urdhërin e arrestit. Detajet shkonin deri aty sa jepej jo vetëm ora, dhe vendi, por edhe se si do të ndodhte arrestimi.

Kafetë, që zakonisht gumëzhinin nga zhurma e ekspresit ishin shndërruar në falltore. Kokat e klientëve lëviznin sa nga filxhanet e kafeve te ekranet e mëdhenj duke, pritur me stoicizëm rënien e njeriut që kishte ecur në korridoret e pushtetit për 30 vjet me lehtësinë e dikujt që besonte se ishte i paprekshëm. “Durim a derëzi. Është vetëm çështje kohe,” “Akuzat mund të jenë të dobta, por provat janë shumë të forta”..

Gazetat, që në këtë vend historikisht kanë thënë vetëm të vërtetën, edhe të shtunen dolën me tituj të mëdhenj për arrestimin. Drejtuesit e emisioneve të mengjesit lexonin titujt si skenat përfundimtare të një drame politike që pritej të ndodhte orë e çast. Titujt që lexoheshin nga televizionet në mëngjes i referoheshin bisedave të darkës në ekran ku shkëlqenin fytyrat serioze të analistëve që analizonin çdo lëvizje të kaluar të Atij si të ishte një gjurmë që zberthente enigmën që do të çonte në fundin e tij të pashmangshëm.

Por në rrugë, jeta vazhdonte me ritmin e saj të zakonshëm. Leku, monedha vendase kishte shtrirë përtokë dhe po i merrte frymën euros dhe dollarit. 30 mijë profesionistë të lirë po lexonin faturat e Tatimeve per fitimin e 2024. Paradhenie! Qeveria vijonte me numërimin e turisteve që vinin nga vendet e BE-se, ndërsa Eurostat numëronte shqiptarët që kërkonin azil në BE!

Dita zgjatej çdo ditë me minuta në kurriz të natës, ndërsa entuziazmi i mëngjesit zbehej nën peshën e diellit të pasdites. Por me rënien muzgut, rritej siguria e babavangave të banaqeve televizive.

Ndërkohë ai e mbylli ditën e ngjeshur me aktivitete fizike dhe postime në Facebook. Në orët e vona u pa në një kafe në qendër të Tiranës, duke qeshur me zë të lartë mbi një filxhan makiato. Njerëzit rreth e rrotull kishin porositur kafe turke, në një përpjekje për të lexuar fatin e tij.

Mbrëmja erdhi dhe shkoi, dhe asnjë sirenë nuk u dëgjua, përveç sirenave të ambulancave që pas djegies së urgjencës silleshin të çoroditura sa nga një spital në tjetrin. Drama nuk ndodhi.

Gazetarët e kronikës që prisnin me minuta ngjarjen e madhe befas u qetësuan si pëllumbat që çukisnin copa buke në sheshin e para Universitetit. Diçka nuk shkonte mire me burimet. Spektakli i pritur nuk ndodhi.

Ndërsa nata zbriti mbi Tiranë, një erë e freskët fëshfërinte përmes rrugëve, ndoshta si një ndjesë për stuhinë që kurrë nuk erdhi. Analistët nga istikamet e tyre në ekran i bënë thirrjen e radhës prokurorisë të mos luante me parashikimet e tyre, ndryshe do të përballeshin me zemërimin popullor.

Po afroheshin Pashkët dhe vendi (bashkë me njerëzit) e meritonte një shi (dush) të mirë.

Aktualitet

Rënia e euros/ Këmbehet me 100 lekë, goditja më e madhe që nga korriku i vitit të kaluar

Që nga data 23 prill, 1 euro po këmbehet mesatarisht në nivelin e 100 lekëve. Statistikat e Bankës së Shqipërisë tregojnë se monedha evropiane është në pikën më të ulët në historikun e këmbimit që nga korriku i vitit të kaluar, atëherë kur ishte edhe piku i sezonit turistik.

Në atë periudhë Banka e Shqipërisë vendosi të ndërhyjë në treg duke rritur kufirin e blerjes së eurove si pjesë e operacioneve për të mbushur rezervat e saj valutore. Kjo solli menjëherë vlerësimin e së monedhës evropiane.

Por, pavarësisht faktit se Banka e Shqipërisë vendosi sërish ta mbajë të lartë kufirin e blerjes së monedhës evropiane gjatë këtij viti në 250 – 330 milionë euro, monedha kombëtare po shkon drejt thyerjes së barrierës psikologjike, ku 100 lek do të kushtojnë më shumë se 1 euro. Kjo po ndodh prej kohësh me dollarin, që vijon uljen në mënyrë të ndjeshme, aktualisht duke u këmbyer me 0.93 lek.

Banka e Shqipërisë ka vlerësuar se leku i fortë ka ndihmuar në stabilizimin e inflacionit dhe çmimeve, duke marrë parasysh se dollari ndikon drejtpërdrejt tek çmimi i naftës dhe lëndëve të tjera të para, ndërsa euro tek importi i mallrave.

Në raportin e stabiliteti financiar për gjashtëmujorin e dytë Banka e Shqipërisë pranon se mbiçmimi i lekut është në përputhje të plotë me rritjen e konsiderueshme të prurjeve valutore nga turistët, ndërsa për herë të parë gjatë vitit të kaluar deficiti i llogarisë korrente ishte pozitiv; kjo do të thotë se më shumë euro mbetën në vend se dolën.

Ndërsa kjo po vijon edhe në tremujorin e parë të këtij viti ku më shumë se 1.5 milion turistë kanë ardhur në vend, me sezonalitetin e turizmi të shtrirë gjatë gjithë vitit.

Aktualitet

VIDEO/ Mbetën të bllokuar në det, shpëtohen 11 turistë në Vlorë

Policia Kufitare dhe Roja Bregdetare kanë shpëtuar 12 shtetas, nga të cilët 11 turistë nga vende të ndryshme, të cilëve ju rrezikohej jeta në mjetin lundrues që kishte pësuar defekt në det.

Pronari i mjetit lundrues u ndëshkua me masë administrative 100 000 lekë, ndërsa mjeti lundrues i tij u bllokua, pasi nuk ishte i pajisur me Çertifikatën e Operatorit Turistik Detar.

Njoftimi i Policisë së Vlorës:

Policia Kufitare dhe Roja Bregdetare shpëtojnë 12 shtetas, nga të cilët 11 turistë nga vende të ndryshme, të cilëve ju rrezikohej jeta në mjetin lundrues që kishte pësuar defekt në det.

Pronari i mjetit lundrues u ndëshkua me masë administrative 100 000 lekë, ndërsa mjeti lundrues i tij u bllokua, pasi nuk ishte i pajisur me Certifikatën e Operatorit Turistik Detar.

Shtetasi E. L., 30 vjeç, banues në Vlorë, ka kërkuar ndihmën e Policisë pasi përballë porit të Vlorës, mjeti i tij lundrues, kishte pësuar defekt në motor.